座廁，亦稱馬桶，作為我哋每日都需要使用嘅家居設備，除咗講求外形同功能之外，使用時嘅舒息度亦非常重要，而更需要注重嘅就係衛生與及易於打理及清潔，所以小編今次就同大家分享一下選購座廁要留意嘅地方。
除咗外形要靚，更仲要試坐！
座廁款式五花百門，外形千變萬化，除咗傳統嘅橢圓形，近年更設計出長型、方形、D形等。選擇外形時除咗考慮美觀之外，仲要試下是否坐得舒服，因為每個人嘅「股形」都不同，邊款座廁坐得舒服，真係要試過先知，所以千祈唔好怕醜！
陶瓷表面質素嘅重要性
唔同品牌嘅座廁之中，其中有一個好大嘅分別，就係除咗價錢外，陶瓷表面質素嘅高低。座廁沖水係咪沖得是否乾淨，便便會否黏附於馬桶表面，好大程度上取決於陶瓷表面。密度較高、較平滑嘅陶瓷表面不易沾上污物或形成水跡，清潔時就更輕鬆。除咗陶瓷表面，座廁價錢牌通常都會標明「連體式」(一體式) 或者「分體式」(相連式)。兩者分別在於連體式座廁是一體燒製而成；分體式則就係分開水箱同底座兩個部分燒製，安裝時再用螺絲連接。連體式座廁消除咗水箱同底座之間嘅罅隙，不會藏汙垢，更加方便清潔同美觀。
沖水方式
常見嘅座廁沖水方式，可分為直沖式、虹吸式排水、旋渦式三類，都會直接影響座廁嘅價錢。直沖式係其中最為普遍嘅款式，佢同虹吸式各有好處；而旋渦式則屬較新嘅技術，結合了兩者優點，但價錢較貴。
買座廁都要啱「咀」形？
絕大部分喺香港出售嘅座廁，都會標明係咩「咀」。最常見嘅有「自由咀」、「高咀」同埋「地去水」，較少見嘅就有「低咀」，呢啲述語所指嘅係去水位高度。購買座廁時，要先了解單位去水喉的高度，再選擇啱「咀」形嘅座廁作配對。
高咀：座廁去水喉中心離地面 180 mm 或者以上，常見款式包括離地 180 mm、185 mm、190 mm 等。高咀座廁適用於高咀嘅大廈去水喉。過去二十年落成嘅香港樓宇大部份採用此設計。
低咀：座廁去水位中心離地面約 100 mm。低咀座廁適用於低咀嘅大廈去水喉。而呢種設計喺三十年樓齡以上舊樓中最常見，但市面上喺低咀馬桶已經越來越少。
地去水：座廁去水位設於地面，分別有離牆9寸同12寸兩種，要配合相同規格嘅大廈去水喉安裝。地去水常見於舊樓中，現時也有小部分新樓盤使用。
自由咀：座廁去水位高度通常同高咀相約，但向前縮咗入坐廁內，以增加同大廈去水喉距離。師傅會使用較長嘅駁喉，以避開枕頭位接駁座廁同大廈去水喉嘅高低差，理論上可配合不同嘅大廈去水喉高度。
但當然，最簡單嘅方法，就係問你嘅裝修師傅。
另外，市面上仲有藏牆同智能馬桶俾消費者選擇，有機會小編會同大家分享選購時要留意嘅地方。